सराईत चोरट्याला अमरावतीतून ठोकल्या बेड्या; शिक्रापूर-शिरूरमधील चोऱ्यांचा पर्दाफाश करत उघडकीस आणल्या तीनही घडामोडी मोठ्या!

आंतरराज्यीय असो वा स्थानिक, गुन्हेगार कायद्याच्या कचाट्यातून सुटणार नाहीत : पोलीस अधीक्षक संदीप सिंह गिल्ल 

शिरूर (प्रतिनिधी) -

महाराष्ट्र आणि मध्यप्रदेश या दोन राज्यांमध्ये घरफोड्यांचे सत्र चालवून धुमाकूळ घालणाऱ्या एका सराईत गुन्हेगाराला पुणे ग्रामीण पोलिसांनी मोठ्या शिताफीने बेड्या ठोकल्या आहेत! स्थानिक गुन्हे शाखा (LCB) आणि शिक्रापूर पोलिसांनी अमरावती जिल्ह्यातील आचलपूर येथून या आंतरराज्यीय चोरट्याला जेरबंद केले. त्याच्याकडून शिक्रापूर आणि शिरूर परिसरातील घरफोडीचे तीन गंभीर गुन्हे उघडकीस आणण्यात आले असून, तब्बल १६ तोळे सोन्याचे दागिने आणि एक मोटारसायकल असा एकूण २४ लाख ३० हजार रुपये किमतीचा मुद्देमाल जप्त करण्यात आला आहे.

दीपक भीमराव दांडगे (वय २५ वर्षे, रा. घुग्री, ता. भैसदेही, जि. बैतुल, मध्यप्रदेश; सध्या रा. कविठा, ता. आचलपूर, जि. अमरावती) असे अटक करण्यात आलेल्या सराईत आरोपीचे नाव आहे.

घटनास्थळ ते सीसीटीव्ही; अशी फिरली तपासाची चक्रे

शिक्रापूर आणि शिरूर पोलीस ठाण्याच्या हद्दीत गेल्या काही दिवसांत वाढलेल्या घरफोडीच्या घटनांची गंभीर दखल घेत पुणे ग्रामीणचे पोलीस अधीक्षक संदीप सिंह गिल्ल यांनी स्थानिक गुन्हे शाखा व संबंधित पोलीस ठाण्यांच्या तपास पथकांची बैठक घेऊन मालमत्तेचे गुन्हे उघडकीस आणण्याचे कडक आदेश दिले होते.

त्यानुसार पोलिसांनी घटना घडलेली ठिकाणे, गुन्ह्यांची वेळ आणि गुन्हे करण्याची विशिष्ट पद्धत (Modus Operandi) यावर बारकाईने काम सुरू केले. गुन्हे घडलेल्या मार्गावरील अनेक सीसीटीव्ही कॅमेऱ्यांचे फुटेज तपासण्यात आले. तांत्रिक विश्लेषणासाठी नेमलेल्या विशेष पथकाला आणि गोपनीय बातमीदारांकडून मिळालेल्या माहितीनुसार, सदर घरफोड्या करणारा संशयित इसम अमरावती जिल्ह्यातील आचलपूर तालुक्यातील मौजे कविठा येथे त्याच्या बहिणीकडे लपून बसल्याची खात्रीशीर माहिती पोलिसांना मिळाली.

अमरावतीत धाड टाकून आवळल्या मुसक्या

मिळालेल्या गोपनीय माहितीच्या आधारे स्थानिक गुन्हे शाखा आणि शिक्रापूर पोलीस ठाण्याच्या संयुक्त पथकाने तात्काळ अमरावती गाठले. मौजे कविठा भागात छापा टाकून संशयित दीपक दांडगे याला ताब्यात घेण्यात आले. पोलिसी खाक्या दाखवत कसून चौकशी केली असता, त्याने शिक्रापूर आणि शिरूर परिसरात घरफोड्या केल्याची कबुली दिली.

या कारवाईमुळे:

  शिक्रापूर पोलीस ठाणे गु.र.नं. ६६९/२०२६ (भा.न्या.सं. कलम ३३१(३), ३०५(ए))

  शिक्रापूर पोलीस ठाणे गु.र.नं. ६७०/२०२६ (भा.न्या.सं. कलम ३३१(३), ३०५(ए))

  शिरूर पोलीस ठाणे गु.र.नं. ७०८/२०२६ (भा.न्या.सं. कलम ३३१(३), ३०५(ए))

   हे तीनही गंभीर गुन्हे एकाच वेळी उघडकीस आले आहेत.

दोन राज्यांत तब्बल १४ गुन्हे दाखल!

पोलिसांनी आरोपीकडून चोरीस गेलेले सुमारे १६ तोळे वजनाचे सोन्याचे दागिने आणि गुन्ह्यात वापरलेली मोटारसायकल असा एकूण २४ लाख ३० हजार रुपयांचा मुद्देमाल हस्तगत केला आहे. धक्कादायक बाब म्हणजे, पकडण्यात आलेला आरोपी दीपक दांडगे हा सराईत गुन्हेगार असून त्याच्याविरुद्ध यापूर्वी महाराष्ट्र व मध्यप्रदेश या दोन्ही राज्यांमध्ये घरफोडीचे तब्बल १४ गुन्हे दाखल असल्याचे निष्पन्न झाले आहे. न्यायालयाने आरोपीला शिक्रापूर पोलीस कोठडी सुनावली आहे.

तपास पथकाचे कौतुक

सदरची उल्लेखनीय कामगिरी पोलीस अधीक्षक संदीप सिंह गिल्ल, अपर पोलीस अधीक्षक डॉ. शुभम कुमार, उपविभागीय पोलीस अधिकारी रवींद्र भोसले यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, शिक्रापूरचे पोलीस निरीक्षक चंद्रशेखर यादव, सपोनि राहुल देशमुख, पोसई महेश डोंगरे, पोसई उमाकांत कुंजीर तसेच अंमलदार संजय पड्याळ, तुषार पंदारे, जनार्दन शेळके, संजू जाधव, राजू मोमीन, विकास पाटील, सागर धुमाळ, धनंजय थेऊरकर, अमोल दांडगे, शिवाजी चितारे, रोहिदास पारखे, अमोल नलगे, मच्छिंद्र निचित, नारायण वाळके, राम जाधव, भारत भोसले आणि महिला पोलीस अंमलदार अस्मिता जोंधळे यांच्या पथकाने केली. या गुन्ह्याचा पुढील तपास शिक्रापूर पोलीस करत आहेत.

आंतरराज्यीय असो वा स्थानिक, गुन्हेगार कायद्याच्या कचाट्यातून सुटणार नाहीत : पोलीस अधीक्षक संदीप सिंह गिल्ल 

"पुणे ग्रामीण हद्दीतील नागरिकांच्या मालमत्तेचे रक्षण करणे आणि सुरक्षिततेचे वातावरण टिकवून ठेवणे हे आमचे सर्वोच्च प्राधान्य आहे. शिक्रापूर व शिरूर परिसरातील घरफोड्यांची मालिका गांभीर्याने घेऊन आम्ही स्थानिक गुन्हे शाखा आणि पोलीस ठाण्यांच्या विशेष तपास पथकांची संयुक्त बैठक घेतली होती. तांत्रिक विश्लेषण, सीसीटीव्ही फुटेजची पडताळणी आणि गोपनीय माहितीच्या आधारे आमच्या पथकाने अमरावती येथे जाऊन सराईत आंतरराज्यीय आरोपीला शिताफीने अटक केली. या कारवाईमुळे तीन गंभीर गुन्हे उघडकीस आले असून २४ लाखांपेक्षा जास्त किमतीचा मुद्देमाल हस्तगत करण्यात यश आले आहे. आंतरराज्यीय किंवा स्थानिक गुन्हेगार कितीही सराईत असला, तरी कायद्याच्या कचाट्यातून सुटू शकणार नाही, असा स्पष्ट इशारा आम्ही देतो. उत्तम कामगिरी करणाऱ्या सर्व तपास पथकाचे मी कौतुक करतो."